© 2010 Freiwillige Feuerwehr Schönau A’ Feuer hats! schreins und alls rennt zsamm, vom Kirchturm wos grod angschlagn ham, da plärrt da Schuasta Nazl oba; Z’ Lochberg brennts-beim Dettlgraba! Na is dös a Gschwatzad hin und her, wos is denn mit da Feuerwehr? Da Binder Seppi soi doch blas’n Ma gspürt an Ruck scho in da Nas’n. Er kimmt scho grennt-den Helm ganz zwarig, an Schurz no um vor lauter trawig. Da bin i, sagt er sakrati, wanns wißats wia i glaffn bi. Die Kinder ham ma’s Horn veramt, doch is weng dem no nix versamt! Und jetzt blasts halt trara-trara als wia da Brand von Moskau war. A Stund danach san’d Feuerwehrmannda bei ean Depot allsamt beinander. Der Schmied muaß neta d’Roß no bschlagn, dö bstimmt san woarn fürn Spritzenwagn. Drum sagt der Hauptmann: Liabe Leit, so langs no brennt is allwei Zeit, derweil fangts eppa no a Haus, oft zahlt sich’s Fortfahrn besser aus. Is eh war, sagt der Wamperl Böck, wans nu oans fangt dann fahrn ma weg. Das gschiacht a und jetzt sans scho gricht. Net z’gach dass uns koa Radl bricht, schreit laut der Hauptmann, liaba rastn, sont z’beutelts uns den Spritzenkasten. Na endlich kemmans an z’Lochberig, mit ean verostn Toiflwerig und dort schreins eahna scho entgegn, ja seits den auf de Losa glegn, a’ so a’ Umadrenzerei, seit Elf’i brennts und jetzt is Drei. Na, na mei Herr, sagt da Hauptmann drauf, zwö herts den a net s’brenna auf und überhaupt so viel ma sehgn, is eh ums ganze Dorf scho gschehgn. Geht’s Mannder fahrn ma wieder zruck, sonst wird uns d’Spritz no schwarz vor Ruck. Und wia ma einfallt grad indessen- mia ham ja eh auf d’Schläuch vergessen.